Category Archives: தென்னை

ஓவென ஒப்பாரியாக மேலெழும் ஓசை…

தரநிலை

காதில் விழுகிறதா அந்த ஓசை?
ஓவென ஒப்பாரியாக
மேலெழுந்து
வீணையின் நாதமாக
கசிந்துருக்கும்.
காற்றினில் ஜனித்த பாடல்
நெஞ்சுருக்கும் கீதமாக….


காற்றின் திசையோடு
இசைந்தாடும் லாகவம்
பெண்ணங்கின் நளின
நடையழகை எள்ளலுடன்
நாணவைக்கும்.

SDC14971-001

அடிவேரில் அலை தழுவ
உவர் நீரைச் சுவைத்துறிஞ்சி
நடனமாடும் பூவுலகத் தேவதைகள்
தம் சிரசில் பரிமாறும் இளங் கனிகள்
கதிரெரிக்கும் வேளைதனில்
வெக்கை தணிக்கும்.

Photo1130-001

இது போதாது
இன்னும் இன்னும்
வேணும் குளிர்மையென
பேராசை பிடித்து
பாளைசீவி வடித்தெடுத்து
மிதமருந்தும் பானம்
அம்மணமாய் அவர் ஈனம்
பறைசாற்றும் ஊரெங்கும்
அவர் மனைவி ஊர்தெருவில்
தலைகாட்ட வழியின்றி
பின்சாரில் ஒழிந்திருப்பாள்.

SDC14140-003

குடலெரியும்
கரைந்தழுகும் அவர் ஈரல்
பெரு வயிற்றில் நீர் சுரக்கும்
பொத்தையாகக் கால் வீங்கும்
படுக்கைப் பாயிலும்
கிடக்கவொண்ணாது
மேல்கீழாய மூச்செறியும்
அவர் வாழ்வு
அவ்வளவுதான்
பாடைக்கு மரம் தறிக்கும்
வேளையாயிடும்.

Cellulitis 9-001

இப்போதும் கேட்கிறதா?
காது கொடுத்துக் கேள்
மூட மனிதா….
ஓலையசைத்துக்
ஏக்கமுடன் எழுப்பும்
குரலோசை
ஓவென ஒப்பாரியாக……!!!

எம்.கே.முருகானந்தன்

…………….